Sisiteme z’Ikoranabuhanga n’Ikimenyetso cy’Inyamaswa

Tubayeho mu gihe hari kubaho impinduka zidasanzwe mu bikorwa byose bibera kuri iyi si yacu. Turasa n’aho turi kuva mu isi y’ibigaragara, twinjira mu isi y’ikoranabuhanga. Ibyo ni byo byiswe impinduka zikomeye (Great reset) muri gahunda nshya y’isi (New world order). Iyi gahunda ifite umuvuduko uteye ubwoba, yatumye habaho kwibaza ibibazo byinshi. Birasa n’aho nta kintu na kwimwe cyasigaye kidakorerwa mu ikoranabuhanga, kandi ubuzima bwose bw’abantu bushingiye kuri iyo mikorere. Tuvugana n’inshuti n’abavandimwe dukoresheje ikoranabuhanga, twakira amafaranga kandi tukayatanga dukoresheje ikoranabuhanga, dusakaza ubutumwa bwiza dukoresheje ikoranabuhanga, tukanunguka ubumenyi bunyuranye dukoresheje ikoranabuhanga.

None se nk’abakiristo, tugomba kwitwara dute ku mikorere nk’iyo ikataje, kandi idateze gusubizwa inyuma? Mbese dukwiriye kugendana n’umuvuduko waryo? Cyangwa dukwiriye kugenda duseta ibirenge muri izi gahunda? Ibihugu byinshi byamaze gutangiza uburyo bwo kwandika imyirondoro y’abaturage babyo mu buryo bw’ikoranabuhanga buhujwe n’ubwenge bukorano (Artificial Intelligence), bituma kubona amakuru y’umuntu byoroha, kandi ntatakare mu buryo bworoshye, ndetse hagashyirwaho n’indangamuntu koranabuhanga, izakurikirwa n’ifaranga koranabuhaga rigenzurwa na banki nkuru z’ibihugu. Ibi bitera benshi kwibaza uko bakwiriye kwifata imbere y’ibi bikorwa byaduka mu isi, ndetse bakabigereranya no gusohora k’ubuhanzi bw’Ibyahishuwe 13. Mbese mu by’ukuri ukuri nyako gushingiye he? Bibiliya ni yo yonyine ibasha kuduha igisubizo gikwiriye kuri iyi ngingo.

Muri iyi nyandiko ngufi, tugiye kuvuga ku Ndangamuntu koranabuganga, n’icyo Bibiliya ivuga kizagira uruhare mu kubuza abantu kugura no kugurisha mu minsi iheruka. Turagaragaza kandi uruhare Indangamuntu koranabuhanga izagira muri iki gikora, n’urwo itazagira. Turavuga kandi icyo Indangamuntu koranabuhanga iricyo n’icyo itari cyo, kugira ngo dukureho urujijo abantu bafite mu bitekerezo byabo, no gufasha gutanga amakuru ashingiye kuri Bibiliya no ku mateka y’ahashize yerekeranye n’ubuhanuzi buheruka amateka y’isi. Kubera ko iyi ari ingingo yagutse, turibanda gusa ku Ndangamuntu koranabuhanga, n’aho itandukaniye n’umubare w’inyamaswa cyangwa ikimenyetso cyayo.

Indangamuntu y’ikoranabuhanga (Digital Identity Card).

Muri gahunda yo gushyira ibintu byose mu ikoranabuhanga, hateganyijwe ko buri muturage wese w’isi agomba kuba afite indangamuntu y’ikoranabuhanga ari yo izahuzwa na konti ye iri mu ikoranabuhanga n’ifaranga ry’ikoranabuhanga (Ikazaba ibaruyeho umutungo we wose, waba ufatika n’udafatika nk’impamyabumenyi). None se mu by’ukuri ibi byaba bivuze iki ku bana b’Imana? Mbese dukwiriye kubiyoboka, cyangwa igihe kirageze ngo dutandukane n’icyitwa ifaranga cyose? Hariho ibitekerezo bivuguruzanya kuri izi ngingo, ariko tugiye kureba uruhare rwa buri kimwe muri ibi, n’ingaruka bigira ku bukristo bwacu.

Kuki ibihugu bikenera kubika amakuru y’abaturage babyo kandi hagakorwa amabarura ahoraho?

Guhera mu mateka ya kera, gahunda y’ibihugu yagiye ishingira ku kumenya umubare w’abaturage babigize, ndetse n’imibereyo y’ababituye, kugira ngo bifashe ubuyobozi mu bikorwa ry’igenamigambi, no kumenya ibikenewe kugira ngo bibashe kugena ingengo y'imari, n’umubare w’ibikorwa remezo bikenewe, n’ahazava amikoro yo kubyubaka.

Buri gihugu gikeneye gutera imbere, kandi kikubaka ubukungu butajegajega, ni ngombwa ko kigira ibikorwa nk’ibyo. Amateka ya Bibiliya atugaragariza uko ubwami bw’ibihangange bwagiye bukurikirana, n’ibanga ryatumaga bubasha kubaka ubudahangarwa bwabyo. Igihugu cya Egiputa, ni kimwe mu bihugu byakomeye cyane ku isi mu myaka yo hambere, kandi aho ni ho ubwoko bwa Isirayeli bwasuhukiye mu gihe cy’imyaka 430, bugakurwayo n’ukuboko kw’Imana. Igihe Abisirayeli bavaga mu Misiri, habanje gukorwa ibarura rya buri muntu hashingiwe ku myaka ye, kugira ngo hamenyekane umubare w’abari bavuye mu buretwa bwa Egiputa.

“Abisirayeli barahaguruka, bava i Rāmesesi bataha i Sukoti, abigenzaga bari abagabo uduhumbi dutandatu, abana batari mu mubare.” Kuva 12:37

Mu rugendo rwo mu butayu bamazemo imyaka 40, bivovoteye Imana bituma abavuye muri Egiputa ari bakuru barimbukira mu butayu. Ubwo bari mu kibaya cy’i Mowabu ku mupaka w’i Shitimu biteguraga kwambuka Yorodani, hakozwe icyaha gikomeye, cyo gusambana n’abamidiyanikazi. Iki cyaha cyababaje Imana, bituma mugiga irimbura ibihumbi makumyabiri na bine (24,000) mu gihe gito. Nyuma y’uko icyo cyorezo gitsembye abari basigaye bavuye muri Egiputa barengeje imyaka 20, Imana yasabye ko hongera kubaho ibarura, kugira ngo hamenyekanye umubare nyawo w’Abisirayeli.

“Hanyuma ya mugiga iyo, Uwiteka abwira Mose na Eleyazari mwene Aroni umutambyi ati “Mubare umubare w'iteraniro ry'Abisirayeli ryose, bamaze imyaka makumyabiri bavutse cyangwa isāga, abo mu Bisirayeli bose babasha gutabara, mubabare nk'uko amazu ya ba sekuru ari.” Mose na Eleyazari umutambyi bababwirira mu kibaya cy'i Mowabu kinini, bari kuri Yorodani ahateganye n'i Yeriko bati “Abamaze imyaka makumyabiri bavutse cyangwa isāga abe ari bo babarwa”, uko Uwiteka yategetse… Abo ni bo babazwe bo mu Bisirayeli, bose bari uduhumbi dutandatu n'igihumbi na magana arindwi na mirongo itatu. Uwiteka abwira Mose ati “Abo azabe ari bo bagabanywa igihugu ho gakondo, nk'uko umubare w'amazina yabo uri. Abaruta abandi ubwinshi uzabahe gakondo nini, abake uzabahe gakondo nto. Umuryango wose uzahabwe gakondo ihwanye n'umubare w'ababazwe bo muri wo.” Kubara 26:1-4; 51-54

Iyi mirongo igaragaza neza ko abisirayeli bongeye kubarwa bahereye ruhande, kandi mu gutanga ubutaka muri Kanani bigakorwa hashingiwe ku mubare w’abagize umuryango runaka. Ni ukuvuga ko Imana yategetse igenamigambi ryo guha gakondo abisiraye ryangombaga gushingira ku bunini cyangwa ubuto bw’umuryango hashingiwe ku mubare w’amazina y’abawugize.

Mu gitabo cy’Umuhanuzi Daniyeli, tubona ishusho y’uko ubwami bukomeye bwakurikiyeho hanyuma ya Egiputa bukagenda busimburana (Daniyeli 2, Daniyeli 7). Bumwe muri ubwo bwami, bwakomeye kurusha ubundi ni ubwami bwa Babuloni, ari nabwo bwanyaze ishyanga rya Isirayeli mu gihe cy’Imyaka 70 bikomotse ku kuba barigometse ku Mana igihe bari muri Kanani. Igihe bajyanwaga bunyago i Babuloni, igikorwa cya mbere Nebukadinezali yakoze ni icyo kwandika imyirondoro y’abanyagano, ndetse bamwe bahindurirwa amazina yabo, hagamijwe kumenya ibyiciro abantu babarizwamo n’umusanzu babashaga gutanga ku gihugu cya Babuloni.

“Nuko umwami ategeka Ashipenazi umutware w'inkone ze, kuzana abana b'abasore bamwe bo mu Bisirayeli bo mu muryango w'umwami, n'ab'imfura bandi batagira inenge, ahubwo b'abanyaburanga, b'abahanga mu by'ubwenge bwose, bajijuka mu byo kumenya, b'ingenzuzi mu by'ubwenge, kandi batinyuka guhagarara mu nzu y'umwami, kugira ngo abigishe ubwenge bw'Abakaludaya n'ururimi rwabo. Muri abo bana b'Abayuda harimo Daniyeli na Hananiya, na Mishayeli na Azariya. Nuko uwo mutware w'inkone abahimba amazina: Daniyeli amwita Beluteshazari, na Hananiya amwita Saduraka, na Mishayeli amwita Meshaki, na Azariya amwita Abedenego.” Daniel 1:3-7

Iki gikorwa cyo guhindura amazina y’abanyagano, bwari uburyo bushya bwo kubatandukanya n’imyizerere yabo, ariko bo bakomeje gushimaka ku kwizera kwabo. Nta hantu na hamwe tubona Daniyeli na bagenzi be batatu bivumburira guhabwa amazina mashya, ndetse n’igihe bayahamagwarwa babaga biteguye gusubiza nta gihunga bafite. Kubahindurira amazina kandi, ntibyigeze bibateshura ku kwizera kwabo. Ntibigeze baterwa ubwoba bw’uko bashyizwe muri sisiteme z’i Babuloni itarubahaga Imana, ahubwo bo barangamiye ibyo bizera batitaye ku byari bibakikije batari bamenyereye aho bari bavanywe muri Isirayeli.

Mu gihe cy’ubwami bw’Abamedi n’Abaperesi bwari buyobowe na Kuro, ni bwo Abisirayeli bakomorewe basubira mu gihugu cyabo. Icyo gihe nabwo habayeho kubarura umubare w’abari bavuye mu bunyage, kandi iki gikorwa cyakomeje gukorwa mu bihe byose byakurikiryeho.

“Kandi abo muri icyo gihugu, Nebukadinezari umwami w'i Babuloni yajyanye ari imbohe, akabajyana i Babuloni, abavuye mu bunyage bagasubira i Yerusalemu n'i Buyuda, umuntu wese agasubira mu mudugudu w'iwabo ni aba. Ni bo bazanye na Zerubabeli na Yeshuwa na Nehemiya, na Seraya na Rēlaya na Moridekayi, na Bilishani na Misipari na Bigivayi, na Rehumu na Bāna. Umubare w'abagabo bo mu Bisirayeli ni uyu:…Nuko iteraniro ryose riteranye ryari inzovu enye n'ibihumbi bibiri na magana atatu na mirongo itandatu; udashyizeho abagaragu babo n'abaja babo, umubare wabo bari ibihumbi birindwi na magana atatu na mirongo itatu na barindwi, kandi bari bafite abagabo n'abagore b'abaririmbyi magana abiri.” Ezira 2:1-65

Muri iki gihe, hari abakomoka mu muryango w’abatambyi, ariko batashoboye kugaragaza ibisekuru byaho hashingiwe ku irangamimerere ryabo, bityo bituma birukanwa mu batambyi: 

“Kandi aba ni bo bazamutse bava i Telimela n'i Teliharisha, n'i Kerubu na Adani na Imeri, ariko ntibabasha kwerekana amazina ya ba sekuruza n'imbyaro zabo yuko ari Abisirayeli koko. Abo muri bene Delaya na bene Tobiya na bene Nekoda, ni magana atandatu ma mirongo itanu na babiri. Kandi n'abo mu batambyi bene Habaya na bene Hakosi, na bene Barizilayi w'Umunyagaleyadi, washatse umugeni mu bakobwa ba Barizilayi w'Umunyagaleyadi akamwitirirwa, abo bashatse amazina yabo mu mibare yo kuvuka kwabo ntibayabona, ni cyo cyatumye batekerezwa nk'abahumanye bagakurwa mu butambyi. Umutirushata ababwira yuko batarya ku bintu byejejwe cyane, kugeza ubwo hazaboneka umutambyi ufite Urimu na Tumimu.” Ezira 2:61-63

Ibi nabyo bitwereka ko irangamimerere ari ikintu kingenzi atari mu bwami bw’isi gusa, ahubwo no mu bwoko bw’Imana, ryahoze ari ikintu Imana yitaho. Ni yo mpamvu ibihugu byose byifuza kurinda ubusugire bwabyo bishyiraho ikiranga abenegihugu, kugira ngo bibashe gutandukanya abaturage bacyo n’abanyamahanga. Ibi byahoze bikorwa no mu bisirayeli, ku buryo igihe cyose habaga hariho umunyamahanga ubasuhukiyemo yahitaga amenyekana, kandi akaba hari ibyo yabaga atabasha kwemererwa kugiramo uruhare bitewe n’ibyabaga bisabwa kugira ngo akore ikintu runaka.

Ubwami bwanyuma bwayoboye isi, ni ubwami bwa Roma, ari nabwo bwabambye Yesu Kristo. Kuri ubu bwami, ni ho Umukiza w’isi yavutse, kandi kugira ngo ubuhanuzi bwa Bibiliya busohore, Imana yakoresheje itegeko teka ry’Umwami w’abami Kayizali Awugusito, ryo kubarura abaturage bose babarizwaga mu ntara y’ubuyuda yari yarigaruriye nk’umwami utegeka isi yose. Iri tegeko ryo kwandikwa mu irangamimerere ryari ritangijwe na Awugusito mu ntara yigaruriye, ni ryo ryasohoje ibyari byarahanuwe, maze bitegurira inzira Yosefu na Mariya kugira ngo Kristo avukire i Betelehemu.

“Nuko muri iyo minsi itegeko riva kwa Kayisari Awugusito, ngo abo mu bihugu bye bose bandikwe. Uko ni ko kwandikwa kwa mbere, kwabayeho Kureniyo ategeka i Siriya. Bose bajya kwiyandikisha, umuntu wese ajya mu mudugudu w'iwabo. Yosefu na we ava i Galilaya mu mudugudu w'i Nazareti, ajya i Yudaya mu mudugudu wa Dawidi witwa i Betelehemu, kuko yari uwo mu nzu ya Dawidi no mu muryango we, ajya kwiyandikishanya na Mariya, uwo yasabye wari utwite. Bakiri iyo igihe cye cyo kubyara kirasohora, abyara umuhungu w'imfura amworosa imyenda y'impinja, amuryamisha mu muvure w'inka kuko bari babuze umwanya mu icumbi.” Luka 2:1-7.

Indangamuntu isanzwe

Mu bihe bitandukanye, no mu bihugu bitandukanye, byagiye bigira uburyo bwo gutanga ibyangombwa biranga abenegihugu babyo, ariko byagiye bihindagurwa hashingiwe ku iterambere rigezweho, n’uburyo bw’ikoranabuhanga bugezweho. Reka twifashishe amateka y’igihugu cyacu cy’u Rwanda kugira ngo tugaragaze uko izo mpinduka zagiye zikorwa. Abantu babanje guhabwa indangamuntu z’impapuro zoroshye gucika, kandi imyirondoro ikuzurishwa intoki. Zaje gusimbuzwa indangamuntu dufite ubu yakozwe mu buryo bw’ikoranabuhanga ryari rigezweho ubwo yatangiraga gutangwa, ndetse bamwe bagiye bayigirira amakenga menshi ku buryo hari n’abayiretse kuyitunga burundu.

Iyi ndangamuntu ni yo ituma umuturage ahabwa serivisi zose zisaba ibyangombwa (nko kwiga, gukora akazi ka Leta, kubarura imitungo yawe, n’ibindi). Ariko muri gahunda nshya y’isi, ni uko buri wese noneho agira indangamuntu yo mu ikoranabuhanga. Uyu ni umushinga wamaze gutangizwa no mu gihugu cyacu (u Rwanda), kandi itegeko nshinga rikaba ryaramaze kongerwamo itegeko ryo gushyiraho iyi ndangamuntu mu gihe kitarenze imyaka ine uhereye 2023. Ibi byakangaranyije abantu benshi bibaza niba mu by’ukuri bakwiriye kuyifata cyangwa batagomba kuyifata. Nk’uko itegeko nshinga ry’u Rwanda ribiteganya, iyo ndangamuntu izaba igizwe n’umubare wayo, ari na wo nyirayo azajya yitwaza, ariko ikazaba inafatika ariko atari ngombwa kuyigendana aho ugiye hose. Amakuru asabwa uyihabwa azaba ayigize, ni imyirondoro ya nyirayo, imitwe y’intoki ze (ibikumwe cumi), isura ye (ifoto ya pasiporo) n’imboni z’amaso zombi. Soma inkuru

Icyiyongereye mu byari bisanzwe mu ndangamuntu dusanganywe ni izi mboni z’amaso n’ibikumwe by’izindi ntoki kuko ibindi byari bisanzwe birimo (ibikumwe bibiri n’ifoto y’isura). Uretse kuba abantu bibaza niba bakwiriye kuyifata, hari n’abadafite iya mbere (iyo dusanganywe), n’abandi bamaze kujugunya burundu izo bari bafite. Impungenge zose zishingiye ku kuvuga ko kuyakira ari ukwakira ikimenyetso cy’inyamaswa cyangwa umubare w’izina ryayo. 

Kugira icyangombwa kiranga umuntu ni ikintu gikenewe kubera ko guhera cyera kose no mu bwoko bw’Imana bwa Isirayeli, bagombaga kugira ikibatandukanya n’abandi bantu b’abanyamahanga. Ikindi kandi ni uko no mu ijuru abamarayika bera bafite amakarita y’izahabu berekana igihe bagiye cyangwa bavuye muri misiyo yabo ku isi. 

“Mu Murwa Wera haba gahunda itunganye no kutanyuranya. Abamarayika bose batumwa gusura isi baba bafite ikarita isizwe izahabu. Bagomba kwereka iyo karita abamarayika bari ku marembo y’umurwa igihe binjiye cyangwa basohotse. Ijuru ni ahantu h’igikundiro. Nifuza cyane kujyayo ngo ndebe Yesu nkunda watanze ubugingo bwe ku bwanjye, no kugira ngo mpindurwe mpabwe ubwiza bwe buhebuje. Mbega uburyo mbuze ururimi rwasobanura iby’ubwiza bw’uwo murwa ugiye kuza! Mfite inyota y’amasoko y’ubugingo atuma umurwa w’Imana unezeza.” Inyandiko Z’ibanze, p.54.1

Niba mu ijuru ubwaho hatarangwa icyaha bakenera kugira icyangombwa cyiranga abinjira n’abasohoka, bikenewe mu buryo bwihariye muri iyi si itarangwamo gahunda kandi yangijwe n’icyaha. Ibyo kandi bifasha leta zo mu isi kugenzura umwanzi wakwihisha agambiriye kurimbura. Bityo ikibazo ntigishingiye ku ikarita, ahubwo gishingiye ku cyo iyo karita yakoreshwa. Urugero mu mateka y’igihugu cyacu, ikarita yifashishijwe mu gutandukanya abaturage hashingiwe ku moko (abahutu n’abatutsi) bagamije gukora Jenoside yibasiye Abatutsi muri 1994. Iki ni igikorwa gishishana kandi giteye ubwoba cyabayeho mu mateka y’u Rwanda, kandi gikorwa hifashishijwe kubarura abaturage binyuze mu kubaha indangamuntu zigaragaza ubwoko bwabo.

Dushingiye kuri ibi byabaye mu Rwanda, tubasha guhamya ko ikarita ishobora kwifashishwa mu kubuza amahirwe n’uburenganzira bamwe batujuje ibyangombwa runaka. Urugero mu gihe cy’Icyorezo cya korona virusi, umuntu wese wabaga adafite ikarita y’uko yikingije, ntiyashoboraga guhabwa serivisi runaka akeneye. Ariko se kuba umuntu yari afite indangamuntu y’uko ari umuhutu cyangwa umututsi hari icyo byabangamiraga ubukristo bwe? N’ubwo benshi batari bazi ikigambiriwe mu gukora ibyo? Igisubizo ni uko bitari icyaha gutunga izo ndangamuntu. Ni muri ubwo buryo no gufata indangamuntu y’ikoranabuhanga mu gihe nta hame ryo mu ijambo ry’Imana bidusaba kwica nta cyaha cyangwa ikosa twaba dukoze. Icyakora izaba kimwe mu bikoresho bizorohereza ubupapa na Leta zo mu isi kubuza uburenganzira ubwoko bw’Imana butazemera kugendana n’agahato k’itegeko ry’icyumweru.

Bimwe mu biteye benshi impungenge ku Ndangamuntu koranabuhanga.

1. Abantu benshi bibajije impamvu izahabwa n’abana bato bakivuka, kandi ubusanzwe yahabwaga umwana ufite imyaka 16 gusa. Iki kibazo kukibaza bishingiye ku makuru make abantu bafite ku ndangamuntu isanzwe, kuko buri mwana wese wanditswe mu gitabo cy’irangamimerere ahabwa nimero imuranga itajya ihinduka na rimwe (application number), kandi ikaba ariyo ishingirwaho mu gukora indangamuntu ifatika ahabwa igihe agize imyaka 16. Ikindi kandi ni uko indangamuntu ifatika iyo itakaye, iyisimbuye iza yahindutseho imibare yanyuma 3, mu gihe ya “application number” yo ikomeza kuba ya yindi. Bityo twavuga ko iyo nimero baha umwana ukivuka ari yo mubare w’indanganumtu wa nyawo, kuko udafite uwo mubare atabasha no kubona indangamuntu ifatika (Kandi ntashobora no guhabwa indangamuntu koranabuhanga, kuko atanditse mu irangamimerere). Ikindi kandi ni uko uwo mubare ukora kimwe na nimero isanzwe y’indangamuntu ifatika.
2. Kuba yarongerewemo ibirango ndangamiterere bitari bisanzwe mu ya mbere nk’imboni z’amaso n’imitwe y’izindi ntoki 8. Ku byerekeye iyi ngingo, benshi bavuga ko bizatuma abantu babasha kugenzurwa na leta zabo mu buryo bworoshye hifashishijwe za camera zo ku muhanda no mu nyubako zitandukanye kandi ikaba ijujwe n’ubwenge buhangano, ariko bakirengagiza ko n’uwaba atabifite yagenzurwa n’izo camera, ariko zikamugaragaza nk’utagira ibyangombwa, bityo agakurikiranwa nk’umucengezi. Nta hantu na hamwe ho kwihisha hahari, uretse mu Mana gusa izahisha ubwoko bwayo nk’uko yahishe Eliya, maze Ahabu akamushakisha akamubura. Ikintu cyose cyinjizwa mu mibiri yacu cyo dukwiriye kukigirira amakenga kandi tukakirinda mu gihe tutazi imikorere yacyo n’ingaruka kizateza, ariko ibintu bidashobora gushyirwa mu mubiri, ntibishobora kugira icyo byagiza ku kwizera kwacu.

Ni iki kibuza abantu kugura no kugurisha?

Igitabo cy’ibyahishuwe igice cya 13 kiduha ishusho y’ibikorwa biheruka bizibasira ubwoko bw’Imana ku bufatanye bw’ubwami 2 bugereranywa n’inyamaswa yavuye mu Nyanja (Ubupapa) n’inyamaswa yavuye mu Butaka (Leta zunze ubumwe za Amerika). Kugwa k’ubwami bwa Roma y’abakayizali kwaharuriye inzira ubupapa bubona isumbwe, bityo bugera ku gasongero ko kurwanya no gutsembaho burundu leta n’amatorero yose atarabupfukamiraga. Abakristo benshi bagiye bicwa urubozo bazira ukwizera kwabo, abami bakomeye bapfukamishwa imbere y’ubutegetsi bw’ubupapa kandi bagasabwa kwisobanura ku mpamvu banyuranyije n’itegeko rya Papa.

   

Nyamara ubwo butware ubupapa bwaje kubutakaza mu 1798, ubwo Napoleon Bonaparte umwami w’Ubufaransa yafungiraga Papa Piyo 6 i Valance mu Bufaransa akaza kugwa muri gereza. Ibyo byatumye ubupapa butakaza ubutware mu bya politiki bwo kugenzura abami, ariko bwaje gusubirana iryo sumbwe mu 1929 ubwo Benito Mussolini umwami w’Ubutaliyani yasubizaga Papa ubutware mu bya Politiki binyuze mu masezerano yagiranye na Papa Gasipari. Igihe uruguma rwica rw’ubupapa rwatangiraga gukira, isi yose yabukurikiye ibutangarira. Kuva icyo gihe kugeza ubu, ibihugu byose bikorera munsi y’ukwaha kw’ubupapa, kandi byiteguye gushyira mu bikorwa icyo busaba cyose. 

Nyamara Ibyahishuwe 13:11-18, hagaragazwa indi nyamaswa yavuye mu gitaka ari yo Leta zunze ubumwe za Amerika yahoze ari igihugu cya giporotesitanti, ariko cyagiye gitakaza imicombonera kugeza ubwo kihakana amahame yose yahoze akiranga. Bibiliya igaragaza neza ko Amerika izakoresha ububasha bwose bw’agahato no kurimbura nk’ubwakoreshejwe n’ubupapa mu gihe cy’umwijima. Ibimenyetso n’ibitangaza by’ibinyoma bikorwa n’amatorero ya giporotesitanti yateshutse ku kuri kw’abagorozi bizigarurira benshi, ari nabyo bizayobora Amerika ku kurema igishushanyo cy’inyamaswa, kandi igatera isi yose kukiramya, ubyanze wese akicwa. Amatorero azasubirana ububasha bwo kugenzura ubutegetsi bwa politiki, kandi ubumwe bw’amadini buzashyiraho amategeko y’agahato yo gusenga ku cyumweru, ashimangirwe n’ukuboko k’ubutegetsi bwa Leta.

“Nuko mbona indi nyamaswa izamuka iva mu butaka. Iyo yo yari ifite amahembe abiri nk'ay'umwana w'intama, ivuga nk'ikiyoka. Itegekesha ububasha bwose bwa ya nyamaswa ya mbere mu maso yayo, ihata isi n'abayirimo ngo baramye ya nyamaswa ya mbere yakize uruguma rwayishe, kandi ikora ibimenyetso bikomeye, imanura umuriro uva mu ijuru ugwa mu isi mu maso y'abantu. Iyobesha abari mu isi ibyo bimenyetso yahawe gukorera imbere ya ya nyamaswa, ibabwira kurema igishushanyo cya ya nyamaswa yari ikomerekejwe n'inkota ikabaho. Ihabwa guha icyo gishushanyo cy'inyamaswa guhumeka, ngo kivuge kandi cyicishe abatakiramya bose. Itera bose aboroheje n'abakomeye, n'abatunzi n'abakene, n'ab'umudendezo n'ab'imbata, gushyirwaho ikimenyetso ku kiganza cy'iburyo cyangwa mu ruhanga, kugira ngo hatagira umuntu wemererwa kugura cyangwa gutunda, keretse afite icyo kimenyetso cyangwa izina rya ya nyamaswa, cyangwa umubare w'izina ryayo.” Ibyahishuwe 13:11-17

Agahato ni yo ntwaro ikomeye muri iyi ntamba iheruka ishingiye ku Kuramya. Amerika ni yo izatangaza itegeko ry’agahato ry’icyumweru binyuze mu busabe bw’amadini yaguye yiyungiye hamwe, kandi ihatire abantu bose bari mu isi kuriyoboka. Iri ni ryo zingiro ryo kubuza abantu kugura no kugurisha. Ntago ifaranga ry’ikoranabuhanga cyangwa indangamuntu koranabuhanga ari byo bizabuza abantu kugura cyangwa kugurisha, ahubwo itegeko ry’agahato ry’Icyumweru ni ryo rizaba intandaro, naho indangamuntu koranabuhanga n’ifaranga koranabuhanga bihinduke ibikoresho byo gufatira umutungo w’umuntu wese utemeranya n’itegeko ry’agahato ry’icyumweru. Ibyo bisobanuye ko hatariho itegeko ry’icyumweru, ingangamuntu koranabuhanga cyangwa ifaranga koranabuhanga bitagira ingaruka ku bana b’Imana, kuko n’ubundi ubu dufite uburyo bwinshi bw’ikoranabuhanga dukoresha mu kugura no kugurisha (MOMO, Airtel Money, Credit cards, …) kandi ntacyo bidutwaye.

Ikizatuma abantu batagura, ni uko batazaba bafite uburenganzira ku mafaranga yabo ari mu ikoranabuhanga, kuko azaba yamaze gufatirwa bitewe no kwanga kuyoboka itegeko ry’agahato ry’Icyumweru. Ibyo bizaba bimeze nko kuba twabyuka uyu munsi, maze tukumva itangazo rivuga ngo: “Inote n’ibiceri dusanzwe dukoresha byose byakuweho burundu”. N’ubwo umuntu yaba abitse miliyoni nshinshi munzu iwe, ntiyazijyana ku isoko ngo agure cyangwa ngo agurishe, kuko yaba yamaze gutakaza agaciro, asigaye ari ibipapuro gusa bitagize icyo bimaze uretse kubicana.) Bityo igihe cyose nta gahato k’iri tegeko gahari, ntacyabuza abantu kubikoresha nk’uko dukoresha ubundi buryo bw’ikoranabuhanga bugezweho.

Ntago ikibazo gikomeye abantu b’Imana bazahangana na cyo ari ikibazo cyo kugura, ahubwo ikibazo gikomeye kizaba gishingiye ku kuramya by’ukuri cyangwa kuramya kw’ikinyoma. Kubuzwa kugura no kugurisha, bizaba igikoresho kizifashishwa mu kubabaza abantu, kugira ngo banyuranye n’imitimanama yabo bave kwizima, bitume bemera kuramya kw’ikinyoma. Iyi ni yo ntwaro satani akoresha guhera cyera kose, kuko adafite ububasha bwo guhatira umuntu gukora icyaha atabyihitiyemo, atera umubabaro mu mutima we, kugira ngo niyumva ababajwe cyane adohoke ku byo yizera agamije kwikiza uwo mubabaro. Iyi ni yo mpamvu hari ibikoresho by’ikoranabuhanga bigenda byubakwa, bizorohereza satani n’abakozi be bamwiyeguriye gufatira imitungo y’abantu bose, igihe bazaba batemera kugendera ku mahame ye.